ماوەی ئەرکی سکرتێری گشتیی ناتۆ یانس ستۆڵتنبێرگ درێژکرایەوە

بڕۆکسل - AA

بۆ جاری چوارەم بڕیار درا بە درێژکردنەوەی ماوەی ئەرکی سکرتێری گشتیی ناتۆ، یانس ستۆڵتنبێرگ بۆ ماوەی ساڵێکی دیکە.

لە راگەیەندراوێکدا کە لەلایەن ناتۆوە بڵاوکراوەتەوە، ئاماژە بەوە کراوە وڵاتانی هاوپەیمان رێککەوتوون لەسەر درێژکردنەوەی ماوەی ئەرکی یانس ستۆڵتنبێرگ کە لە ٣٠ ئەیلوولدا کۆتایی دێت.

ئاماژە بەوە کرا بڕیارەکە لە سەروبەندی لووتکەی ناتۆ کە لە رۆژانی ١١-١٢ی تەمووزدا لە شاری ڤیلنیوس سازدەکرێت، لەلایەن سەرۆکی دەوڵەت و حکوومەتەکانەوە پەسەند دەکرێت.

بەو بڕیارەش، یانس ستۆڵتنبێرگ هەتا یەکی تشرینی یەکەمی ٢٠٢٤ وەک سکرتێری گشتیی ناتۆ بەردەوام دەبێت لەسەر ئەرکەکەی.

سکرتێری گشتیی ناتۆ، یانس ستۆڵتنبێرگ لە لێدوانێکیدا سەبارەت بە بڕیارەکە رایگەیاند: ''شەرەفمەندم بە بڕیاری درێژکردنەوەی ماوەی ئەرکەکەم لەلایەن هاوپەیمانانی ناتۆوە''.

یانس ستۆڵتنبێرگ لە یەکی تشرینی یەکەمی ٢٠١٤ەوە ئەرکی سکرتێری گشتیی ناتۆ بەڕێوەدەبات.

یانس ستۆڵتنبێرگ کە سەرۆکوەزیرانی پێشووی نەرویجە، پێشتر سێ جار ماوەی ئەرکەکەی وەک سکرتێری گشتیی ناتۆ درێژکراوەتەوە.