سەرۆکی حکوومەتی هەرێمی کوردستان مەسرور بارزانی پێشوازی لە وەزیری بەرگری تورکیا خولوسی ئاکار کرد.
نووسینگەی راگەیاندنی سەرۆکوەزیرانی هەرێمی کوردستان بڵاویکردەوە کە "لە دیدارەکەدا بارودۆخی عێراق و ناوچەکە و پەرەپێدانی زیاتری پەیوەندییەکانی نێوان هەرێمی کوردستان و تورکیا تاووتوێ کرا. جەخت لە گرنگیی هەماهەنگيی و بەردەوامیی پەیوەندی دۆستانە لە نێوان هەرێمی کوردستان و تورکیا کرایەوە. بەتایبەتی بەهێزکردنی هەماهەنگیی و هاریکاریی لە پێناو سەقامگیرکردنی ئاشتی و ئاسایشی ناوچەکەدا".
وەک لە هەواڵەکەدا هاتووە، "لە تەوەرێکی دیکەی کۆبوونەوەکەدا، جەخت لە گرنگیی جێبەجێکردنی ڕێککەوتننامەی شنگال و دەرچوونی میلیشیا و هێزە چەکدارە نایاساییەکان کرایەوە لەپێناو ئاساییکردنەوەی دۆخی دەڤەرەکە و گەڕانەوەی ئاوارەکان بۆ شوێنەکانیان".
ئێوارەی دۆینێ دووشەممە، خولوسی ئاکار دوای دیدار و کۆبوونەوەکانی لە بەغدا لەگەڵ هەریەکە لە سەرکۆمار بەرهەم ساڵح و سەرۆکوەزیران مستەفا کازمی و وەزیری بەرگری جومعە عناد، سەردانی هەولێری کرد.
بەر لە دیدار لەگەڵ سەرۆکوەزیرانی مەسرور بارزانی، خولوسی ئاکار لە لایەن سەرۆکی پێشووی هەرێمی کوردستان مەسعود بارزانییەوە پێشوازی لێکرا.
