میحوەری مەخموور..چەند مووشەکێک بە گازی کیمیایی ئاراستەی هێزەکانی پێشمەرگە کرا

ماوەیەکە چەکدارانی رێکخراوی تیرۆریستی داعش لە رێگای مووشەکەوە ماددەی کیمیایی بەکاردەهێنن و بەڕێوەبەری گشتی دەزگای هەواڵگری ئەمەریکا جەیمس کلاپەر لە سەرەتای مانگی 2 بە کۆنگرێسی ڕاگەیاندبوو کە ئەو گرووپە توندڕەوە چەکی کیمیاییان لە عێراق و سووریاش بەکارھێناوە.

بەرپرسی میحوەری مەخموور – گوێر سیروان بارزانی ئاماژە بەوە دەکات کە لە میحوەرەکەی ئەوان، چەکدارانی داعش لە رێگای مووشەکەوە گازی کیمیاییان بەکارهێناوە و بەم هۆیەوەش چەند پێشمەرگەیەک بریندار بوون.

سیروان بارزانی لە لێدوانێکی بۆ ئاژانسی ئانادۆڵو گوتی: "چەکدارانی داعش هەفتەی رابردوو دووجار چەکی کیمیاییان بەکارهێنا دژی پێشمەرگە و ئێوارێ دوێنێش 12 مووشەکیان ئاراستەی هێزەکانی پێشمەرگە کرد و 6 پێشمەرگەمان بریندار بوون کە تەندروستی 5 پێشمەرگەیان باشە".

لەبارەی پێداویستییەکانی سەلامەتی هێزەکانی پێشمەرگە بۆ خۆپاراستن لە هەر مادەیەکی هاوشێوە، بەرپرسی میحوەری مەخموور – گوێڕ ئاماژە بەوە دەکات کە ئەوان پێداویستییەکانیان زۆر کەمە و لەمبارەیەوە گوتی: "پێداوستییەکانی سەلامەتیمان زۆر کەمە بەڵام گازەکەش بەو شێوەیە نییە کە بڵێن زۆر مەترسیدارە".

سەبارەت بە هاوکارییەکانی ئەمریکا بۆ هێزەکانی پێشمەرگە، بەرپرسی میحوەری مەخموور – گوێر ئاماژە بە ژمارەی لیوایەکان دەکات و ئاشکرای دەکات کە هێشتا هاوکارییەکان نەگەیشتوون و لەمبارەیەوە سیروان بارزانی گوتی: "هاوکارییەکانی ئەمریکا هێشتا نەگەیشتووە و بڕیارە ئەو دوو لیوایەی پێشمەرگە پڕ چەک بکرێت بە چەکی نوێ و جگە لەوەش لە رووی دابینکردنی ئازووقەش هاوکاری پێشمەرگە دەکرێت".

لەبارەی بەشداریکردنی هێزەکانی پێشمەرگە بۆ کۆنترۆڵکردنەوەی مووسڵ، سیروان بارزانی رایدەگەیەنیت کە هێزەکانیان بڕیاری بەشداریکردنی کۆنترۆڵکردنەوە مووسڵیان داوە بەڵام ئاماژەی بە چۆنییەتی بەشداریکردنەکە کرد و گوتی: "هێزەکانی پێشمەرگە بڕیاری بەشداریکردنی کۆنترۆڵکردنەوەی مووسڵیان داوە بەڵام مەرج و پلانەکان دیارنییە کە لە کام میحوەر و چۆن بەشداردەبین".

سەبارەت بە هێز و توانای داعش لە ئێستاشدا، سیروان بارزانی پێی وایە کە داعش توانای کەم بووتەوە و بە بەراورد لەگەڵ پێشووتردا و لەمبارەیەوە گوتی: "ئەوەی ئێمە دەیبینین توانای گرووپە تیرۆریستییەکانی داعش لاوازە و هێرشی گەورە ئەنجام نادەن بەڵام هەندێک جار لە رێگای مووشەکەوە بۆردومان دەکەن".

لەبارەی راوەستانی شەڕ لە نێوان سوپای عێراق و تیرۆریستییەکانیش، بەرپرسی میحوەری مەخموور – گوێڕ پێی وایە هێزەکانی سوپای عێراق هەنووکە خەریکی گۆڕینی پلانی شەڕکردنن و ئاماژەی بەوەش کرد کە پێدەچیت کەشوهەوا لەبار نەبووبیت بۆ شەڕکردن و لەمبارەیەوە گوتی: "هێزەکانی سوپای عێراق لە ئێستادا بۆ شەڕکردن پلانەکەیان گۆڕیوە و دیارە پلانی یەکەمجاریان سەرکەوتوو نەبووە و لەگەڵ ئەوەشدا کەشوهەواش لەبار نەبووە بۆ چۆنیەتی شەڕکردنییان لەگەڵ تیرۆریستییەکانی داعش".

لە چوارچێوەی ئۆپەراسیۆنەکانی کۆنترۆڵکردنەوەی شاری مووسڵ، فیرقەی 15ـی سوپای عێراق ماوەی زیاتر لە 3 مانگە لە مەخموور جێگیرکراون و لە سەرلەبەیانی رۆژی پێنجشەممە 24-3-2016 یەکەم هێرشی بەرفراوانیان لە باشووری رۆژئاوای مەخموور و بەرزاییەکانی سوڵتان عەبدوڵڵا دەستپێکرد و هەمان رۆژ گوندەکانی کەرمردی و کودیلەیان بەبێ هیچ بەرەنگاربوونەوەیەکی داعش کۆنترۆڵکردەوە و دوای سێ هەفتەش بۆ ماوەی چەند کاتژمێرێک توانییان بچنە ناو گوندی نەسڕ و دواتر لە ئەنجامی هێرشێکی داعش بۆ ئەو گوندە، لەلایەن هێزەکانی سوپای عێراق ئەو گوندە چۆڵکرا و لە ئێستاشدا ئۆپەراسیۆنەکانی کۆنترۆلکردنەوەی شاری مووسڵ راوەستاوە.

جێی وەبیرهێنانەوەیە رۆژی ١٢-٨-٢٠١٥ بۆ یەکەمجار چەکدارانی داعش نزیکەی ٤٥ گولـلەھاوەنی جیاوازیان ئاراستەی پێشمەرگە کرد و لەو ھێرشەی داعشدا کە تەنیا لەڕێگەی ھاوەنەوە بوو، چەند پێشمەرگەیەک بەھۆی ماددە کیمیاوییەوە جەستەیان سووتا، دەستبەجێش تیمێکی سەربازیی ئەمریکی و فەڕەنسی گەیشتنە میحوەرەکە و لێکۆڵینەوەیان لە ماددەکە دەستپێکرد و دواتر وەزارەتی بەرگریی ئەڵمانیا ھەواڵەکەی پشتڕاستکردەوە و رایگەیاند کە پێشمەرگە بە چەکی کیمیایی ماددەی کلۆرین لەلایەن داعشەوە ھێرشی کراوەتەسەر.