عێراق نزیكه‌ی 800 ئه‌ندامی بیانیی داعش دادگایی ده‌كات

هه‌ولێر-AA

عێراق بیانییه‌كانی نێو داعش دادگایی ده‌كات و ده‌رفه‌تیش بۆ باڵیۆزخانه‌ی وڵاتان ده‌كاته‌وه‌ ئاماده‌ی دانیشتنه‌كان ببن.

عێراق سه‌دان ئه‌ندامی گرووپه‌ توندڕه‌وه‌كان به‌تایبه‌ت ده‌وڵه‌تی ئیسلامی له‌ عێراق و شام ناوزه‌ند كراو به‌ "داعش" دادگایی كردووه‌ و چه‌ندین حوكمی سزادانی له‌مباره‌یه‌وه‌ ده‌كردووه‌، دادگاییكردنه‌كانیش سه‌رجه‌م گه‌ره‌نتییه‌كانی بۆ تاوانباران دابینكراوه‌ و چه‌ندین باڵیۆزی ئه‌و وڵاتانه‌ی ئه‌و كه‌سانه‌ ره‌گه‌زنامه‌یان هه‌یه‌ تێیاندا ئاماده‌ی دادگاییكردنه‌كان بوون.

به‌پێی راپۆرتێك كه‌ ناونیشانی "دادگا زیاتر له‌ 800 تیرۆریستی بیانیی ملكه‌چی رێوشوێنه‌كانی كردووه‌ له‌ماوه‌ی ساڵ و نیوێكدا" و له‌ ژماره‌ 43ی ئایاری ئه‌مساڵی هه‌ڵگرتووه‌ باس له‌وه‌ ده‌كات كه‌ چه‌ندین ئه‌ندامی داعش دادگایی كراون.

رۆژنامه‌ی "القضا‌" كه‌ رۆژنامه‌یه‌كی مانگانه‌ی فه‌رمییه‌ و له‌لایه‌ن ئه‌نجوومه‌نی باڵای دادوه‌ری له‌ عێراقه‌وه‌ ده‌رده‌چێت.

له‌ راپۆرته‌كه‌دا هاتووه‌ "دادگا له‌ماوه‌ی ساڵ و نیوێكیدا رێوشوێنی له‌دژی 810 تیرۆریستی بیانی گرتووه‌ته‌ به‌ر و هه‌ڵگری ره‌گه‌زنامه‌ی جیاوازبوون و دادوه‌ره‌كان ئه‌وه‌یان راگه‌یاندووه‌ كه‌ سه‌رجه‌م ئه‌و تیرۆریستانه‌ی كه‌ تاوانكارییان كردووه‌ له‌سه‌ر خاكی عێراق یان په‌یوه‌ندییان به‌ داعشه‌وه‌ كردبێت به‌پێی یاسای به‌رنگاربوونه‌وه‌ی تیرۆری عێراقی سزا ده‌درێن".

به‌پێی ئاماره‌كانی ئه‌نجوومه‌نی باڵای دادوه‌ریی كه‌ ده‌ستی رۆژنامه‌كه‌ كه‌وتووه‌ ژماره‌ی ئه‌و كه‌سانه‌ی له‌ماوه‌ی ساڵی 2018 تا نیوه‌ی یه‌كه‌می ساڵی 2019 دادگایی كراون و رێوشوێنه‌كانی دادگه‌یان به‌رامبه‌ر گیراوه‌ته‌ به‌ر 810 كه‌س بوون و حوكم له‌ دژی 514یان ده‌رچووه‌ و له‌نێو ئه‌مانه‌دا نێر و مێ هه‌ن، هه‌روه‌ها 202 دۆسییه‌ی تر له‌ژێر لێكۆڵینه‌وه‌دایه‌، ئه‌وه‌ سه‌رباری ئه‌وه‌ی 44 تۆمه‌تبار هێشتا له‌كاتی دادگاییكردندان، 11 كه‌سیشیان هیچ تۆمه‌تێكیان به‌سه‌ردا ساغ نه‌بووه‌ته‌وه‌.

سه‌رۆكی دادگای تاوانه‌كانی تایبه‌ت به‌ پرسه‌كانی تیرۆر دادوه‌ر ئه‌حمه‌د ئه‌میری له‌مباره‌یه‌وه‌ رایگه‌یاندووه‌ "سه‌رجه‌م ئه‌و كه‌سانه‌ به‌پێی یاساكانی عێراق سزا ده‌درێن".

ئه‌وه‌شی گوتووه‌ "دادگایی كردنی ئه‌و كه‌سانه‌ له‌ به‌غدا ده‌بێت بۆ ئه‌وه‌ی باڵیۆزخانه‌ی وڵاتان توانایان هه‌بێت ئاماده‌ی دانیشتنه‌كانی دادگا ببن".