Mustafa Talha Öztürk
15 Јули 2024•Ажурирај: 17 Јули 2024
БЕЛГРАД (АА) - Туркије денес испрати два авиона и хеликоптер во Северна Македонија за поддршка во борбата против шумските пожари, изјави турскиот министер за земјоделство и шумарство, Ибрахим Јумакли, јавува Анадолу.
„Ние сме на должност за шумите, нашето заедничко наследство. За поддршка на борбата против тековните шумски пожари, 2 наши авиона и 1 хеликоптер отидоа во Северна Македонија. Ги пренесувам моите најдобри желби до населението на Северна Македонија и им посакувам на нашите тимови успех во нивните должности“, напиша министерот Јумакли на социјалната мрежа Х.
Директорот на Центарот за управување со кризи на Северна Македонија, Стојанче Ангелов, соопшти дека помошта од Туркије пристигнала на аеродромот во Скопје.
Седум шумски пожари ја зафатија Северна Македонија што ја поттикна Владата да прогласи кризна состојба.
Повеќе од 100 хектари шума се изгорени за време на викендот и покрај напорите на пожарникарите.
Кризната состојба на територијата на Република Северна Македонија ќе трае 30 дена, се вели во соопштението на Владата.
Покрај алармирањето на медицинскиот персонал, Владата одобри и ангажирање на полицијата и Армијата во борбата против пожарите.
Премиерот Христијан Мицкоски претходно најави дека помош во борбата против пожарите наскоро ќе пристигне од Србија, Словенија, Црна Гора и Туркије.
Српскиот министер за внатрешни работи Ивица Дачиќ изјави дека добиле барање за помош од Северна Македонија.
Дачиќ рече дека Србија ќе испрати хеликоптери за гаснење на пожарот.
Мицкоски денес рече дека очекува шумските пожари да бидат ставени под контрола „утре или најдоцна заутре“.
Северна Македонија денес забрани движење во шумите од 6 до 20 часот.
Министерството за земјоделство и шумарство соопшти дека забраната ќе трае сѐ додека не се намали ризикот од шумски пожари.
Земјите од регионот, меѓу кои и Северна Македонија, минатата недела издадоа предупредување за екстремни временски услови.
