Канада ги отстрани американските риби и морски плодови од листата за контрацарини по реакциите на индустријата

Канада ги отстрани рибите и морските плодови од листата на американски производи за кои беа предвидени контрацарини. Од Министерството за финансии денес соопштија дека оваа одлука е донесена по реакциите и повратните информации од домашната индустрија, јавува Анадолу.

Измената следуваше еден ден откако Отава објави воведување одмазднички царини за американски производи во вредност од околу 20 милијарди долари, како одговор на царините воведени од Вашингтон.

Министерството соопшти дека промената е направена „за да се заштити од пошироки економски штети“, без да даде дополнителни детали.

„Континуирано работиме со канадските индустрии за да ја процениме ефикасноста на овие мерки, со примарен фокус на индустриите што беа цел на американските царини“, се вели во соопштението објавено на американската платформа за социјални медиуми Х.

Отава соопшти дека ќе ги приспособи мерките за да одговори на американските царини со мерка од иста вредност (долар за долар).

Контрацарините на Канада треба да стапат на сила на 8 септември.

Некои канадски преработувачи на морска храна, кои увезуваат американски јастог, изразија загриженост дека царините ќе ги зголемат нивните трошоци, а домашните производители стравуваа дека мерките би можеле да предизвикаат дополнителни одмазднички мерки од САД.

Првичниот пакет во голема мера ги опфаќаше производите што беа вклучени во американските царини во вредност од околу 20 милијарди долари, што стапија на сила во саботата, вклучително и производи од целулоза и хартија. Сепак, рибите и морските плодови не беа меѓу секторите што Вашингтон конкретно ги имаше како цел.