Rabia İclal Turan
09 Септември 2026•Ажурирано: 09 Септември 2026
Американскиот претседател Доналд Трамп вчера потпиша серија прогласи со кои се забранува увоз на одредени канадски млечни производи, алкохолни пијалаци и моторни возила во САД, според веб-страницата на Белата куќа, пренесува Анадолу.
Забраните стапуваат на сила на 29 септември, додека посебни прогласи што го менуваат опсегот на производи што подлежат на постојните царини од 50 % за канадските моторни возила и алкохолни пијалаци стапуваат на сила на 15 септември. Производите што веќе се увезени, но сè уште не се внесени во потрошувачка пред да стапат на сила забраните, ќе останат предмет на постојната царинска стапка од 50 %.
Висок функционер во администрацијата, информирајќи ги новинарите, рече дека мерките доаѓаат како одговор на новите царини што Канада ги воведе за американскиот челик, бела техника и млечни производи.
„Забрануваме одреден број производи. Меѓу кои и млечни производи, како и повеќето алкохолни производи... и го забранивме увозот на моторни возила од Канада“, рече претставникот додавајќи дека мерките имаат за цел „да одржат еднакви услови, да спречат одмазда и, секако, да го заштитат американското производство“.
Тој истакна дека администрацијата, исто така, ги отстранила царините за некои производи првично воведени на 20 јули, како цементот, додека додала други како што се трговски возила, одредени сирења и моторни чамци.
Трамп одделно им наложи на американскиот трговски претставник и на Администрацијата за општи услуги (ГСА) да ги отстранат стоките со канадско потекло од листата за набавки на ГСА, рече претставникот, опишувајќи ја таа работа дека е „во тек“.
