Aysu Biçer
06 Октомври 2022•Ажурирај: 09 Октомври 2022
АНКАРА (АА) - Светот најверојатно нема да ја исполни целта за ставање крај на екстремната сиромаштија до 2030 година, покажува новата студија на Светска банка, јавува Агенција Анадолија (АА).
Извештајот на банката за сиромаштијата и заедничкиот просперитет покажа дека глобалниот напредок во намалувањето на екстремната сиромаштија е запрен.
„Ковид-19 го предизвика најголемиот неуспех на глобалните напори за намалување на сиромаштијата од 1990 година и војната во Украина се заканува да ги влоши работите“, се наведува во извештајот.
Глобалното тело процени дека пандемијата вовлекла речиси 70 милиони луѓе во екстремна сиромаштија во 2020 година, најголемото едногодишно зголемување од почетокот на глобалното следење на сиромаштијата во 1990 година.
„Како резултат на тоа, околу 719 милиони луѓе преживуваа со помалку од 2,15 долари на ден до крајот на 2020 година“, се вели во извештајот.
Извештајот покажува дека околу 600 милиони луѓе, главно во Супсахарска Африка, сè уште ќе живеат со помалку од 2,15 долари на ден до 2030 година.
Истакнувајќи дека силните мерки на фискалната политика направиле „забележителна разлика“ во намалувањето на влијанието на пандемијата врз сиромаштијата, се вели дека во отсуство на фискална интервенција, просечната стапка на сиромаштија во економиите во развој би можела да биде за 2,4 поени повисока.
Коментирајќи го извештајот, претседателот на Светска банка, Дејвид Малпас, рече: „Напредокот во намалувањето на екстремната сиромаштија во суштина е запрен во тандем со забавениот глобален економски раст.“
„Потребни се корекции на макроекономските политики за да се подобри распределбата на глобалниот капитал, да се поттикне стабилноста на валутата, да се намали инфлацијата и да се рестартира растот на средниот приход. Алтернативата е статус кво - забавување на глобалниот раст, повисоки каматни стапки, поголема одбивност кон ризик и кревкоста во многу земји во развој“, додаде тој.
