СЗО: Пушењето може да ја намали плодноста и кај жените и кај мажите

Пушењето може да ги намали шансите за зачнување и кај жените и кај мажите, додека пасивното пушење може да претставува и репродуктивен ризик, објави денес Светската здравствена организација (СЗО), јавува Анадолу.

Во ново резиме за темата, СЗО истакна дека употребата на тутун е поврзана со неплодност кај жените и штетни ефекти врз спермата и сексуалната функција кај мажите.

Преглед на студии спроведени помеѓу 2000 и 2026 година покажа дека жените кои моментално пушат имаат 40% поголем ризик од неплодност во споредба со непушачите. Оние кои престанале да пушат може да имаат 25% помал ризик во споредба со жените кои продолжуваат да пушат.

За мажите, преглед на 44 студии во кои учествувале повеќе од 60.000 луѓе го поврза пушењето со репродуктивни проблеми, вклучувајќи абнормалности на спермата, еректилна дисфункција и проблеми со ејакулација.

Пушењето може да ја намали и ефикасноста на асистираната репродукција, вклучително и ин витро оплодувањето, при што истражувањата укажуваат дека успешните исходи би можеле приближно да се преполоват.

На глобално ниво, едно од шест лица во репродуктивна возраст доживуваат неплодност во одреден момент од својот живот, според здравствената агенција на Обединетите нации.