Лидерите на Г-20 се собраа во Хамбург и покрај протестите

ХАМБУРГ (АА) - Лидерите на дваесетте најголеми светски економии се собраа денес во германскиот град Хамбург, за да дискутираат за глобалната економија, климатските промени и за борбата против тероризмот, јавува Anadolu Agency (AA).

Германската канцеларка Ангела Меркел ги поздрави лидерите, меѓу кои и американскиот претседател Доналд Трамп, рускиот претседател Владимир Путин и турскиот претседател Реџеп Таип Ердоган.

Неколкумина лидери не пристигнаа навреме на Самитот Г-20 поради големите антикапиталистички протести во градот. Додека повеќето од демонстрантите беа мирни, неколку анархистички групи запалија десетици автомобили, објавија локалните медиуми.

Полицијата во Хамбург ја засили безбедноста со стотици полицајци кои патролираат во градот, а полициски хеликоптери кружат околу местото каде што се одржува Самитот.

Лидерите на Г-20 за време на деловниот ручек се очекува да зборуваат за глобалната економија, развојот и за трговијата. Попладне се очекува нивните дискусии да бидат фокусирани на одржливиот развој, климатските промени и на енергијата.

Извозните гиганти, Германија и Кина, се залагаат земјите на Г-20 да ја поддржат слободната трговија и да се спротивстават на економскиот изолационизам поради растечката загриженост од протекционистичкиот став на американскиот претседател Доналд Трамп.