Nuri Aydın
26 Септември 2019•Ажурирај: 26 Септември 2019
АНКАРА (АА) - Поради глобалното затоплување и климатските промени, околу 60 проценти од глечерите на планините Хиндукуш и Хималаите може да се стопат до 2100 година, пренесува Anadolu Agency (AA).
Во извештајот со наслов „Океаните и криосферата при промена на климата“ на меѓувладиниот Панел за климатски промени (IPCC) се предвидува дека 60 отсто од глечерите на планинските венци Хиндукуш и Хималаи може да се стопат до крајот на овој век, како резултат на глобалното затоплување и климатските промени.
Исто така, во извештајот се истакнува дека регионот може да биде под големо влијание и од најмал пораст на температурата и се додава дека со глобалното затоплување од 1,5 степени Целзиусови, температурата во регионот на крајот на овој век може да се зголеми од 3,5 до 6 степени.
Се предвидува дека поплавите во сливот на реките Инд, Ганг и Брамапутра ќе бидат почести и посериозни поради зголемувањето на врнежите во наредните години.
„Во светот, 46 градови се изложени на ризик поради порастот на нивото на морето од само 50 сантиметри“, се истакнува во извештајот и се додава дека 150 милиони луѓе кои живеат во пристанишните градови ќе се соочат со ризик од поплави.
Во извештајот, исто така, се утврдува дека ова можно топење може да има позитивно влијание врз водните ресурси.
„Глобалното затоплување и неговиот потенцијален придонес за водните ресурси на планинските венци Хиндукуш и Хималаи директно ќе влијаат на локалното користење на водата, земјоделството и хидроелектриката“, рече коавторот на извештајот, Ајнџал Пракаш.
Водните ресурси во планинските венци директно влијаат врз 120 милиони луѓе поради нивната употреба во земјоделството. Од друга страна, преку сливот на реките индиректно влијаат врз 1,3 милијарда луѓе во Индија, Тибет, Непал, Пакистан, Бангладеш и Авганистан.
