Бројот на загинати во поплавите во индиската сојузна држава Асам се зголеми на 100

Бројот на загинати во поплавите во североисточната индиска сојузна држава Асам се зголеми на 100, пренесува Анадолу.

Државната управа за управување со природни катастрофи на Асам доцна синоќа соопшти дека се пријавени уште два смртни случаја.

Премиерот на државата, Химанта Бисва Сарма, на американската платформа за социјални медиуми Х објави дека се погодени околу 1,1 милион лица во 25 окрузи во државата.

Тој наведе дека во Асам моментно функционираат повеќе од 2.000 центри за дистрибуција на хуманитарна помош.

„Продолжуваат напорите за нормализирање на состојбата“, додаде Сарма.

Владата на Асам вчера започна и процена на штетите од поплавите директно на терен, во домовите во сите погодени окрузи.

„Оштетените домови, добитокот и сите други последици ќе бидат евидентирани до 31 август. Ниедно семејство нема да биде изоставено при добивањето соодветни средства за обновување“, рече Сарма.