Иранскиот претседател изјави дека Техеран „не бара војна“ по американскиот напад врз островот Ларак

Техеран „не бара војна“, но исто така „никогаш нема да мирува пред каква било агресија“, изјави денес иранскиот претседател во своите први коментари по нападот на САД врз иранскиот остров Ларак за време на викендот, пренесува Анадолу.

Во говорот пред да замине за Киргистан на меѓународен самит, Масуд Пезешкијан рече дека Иран ќе одговори цврсто на какви било понатамошни напади, објави новинската агенција Фарс.

Иран „ќе им даде решителен одговор на агресорите“ доколку биде нападнат, рече тој.

„Нестабилноста и немирите во регионот не се во интерес на ниедна земја и ќе бидат предизвик за сите“, додаде тој.

Пезешкијан треба да пристигне во главниот град на Киргистан, Бишкек, за да присуствува на самитот на шефовите на земјите членки на Шангајската организација за соработка (ШОС).

Вчера американските сили погодија два ирански лансера на островот Ларак, што се први американски напади врз иранска територија од крајот на јули, изјави американски функционер за „Аксиос“.

Операцијата беше насочена кон системи што наводно се подготвувале да лансираат ракети со морски мини во Ормускиот Теснец.

Иранската Исламска револуционерна гарда (ИРГЦ) соопшти дека неколку борци и цивили биле убиени и повредени во нападот и вети дека ќе возврати.

Иранската новинска агенција Тесним објави дека првичните информации укажуваат дека нападот бил извршен со беспилотни летала.