Москва протера група унгарски дипломати во реципрочен потег

Русија денес соопшти дека протерала група дипломати од унгарските дипломатски претставништва во земјата како реципрочна мерка, јавува Анадолу.

Министерството за надворешни работи соопшти дека вршителот на должноста амбасадор на Унгарија во Русија бил повикан и бил информиран за одлуката, која се однесува на „група членови на персоналот“ на унгарската амбасада во Москва и конзулатите во Санкт Петербург и Казан.

„На шефот на дипломатската мисија му беше упатен остар протест поради неоснованото и отворено непријателско барање на унгарските власти – издадено на 8 септември 2026 година – одреден број руски дипломатски службеници да ја напуштат земјата“, се наведува во соопштението.

Министерството додаде дека унгарските дипломати мора да ја напуштат територијата на Русија во рок од две недели.

Унгарската министерка за надворешни работи Анита Орбан на 8 септември објави дека Будимпешта протерала 10 руски дипломати, наведувајќи дека тие „се занимавале со активности во Унгарија што се неприфатливи за дипломати во согласност со Виенската конвенција“.

Таа нагласи дека потегот бил насочен кон заштита на безбедноста и суверенитетот на земјата, додавајќи дека одлуката не значи прекин на дипломатските односи со Москва и дека Унгарија ќе продолжи со дијалогот со Русија.

Од своја страна, Кремљ соопшти дека Москва ќе преземе „соодветен“ одговор на овој потег, наведувајќи дека тој негативно ќе влијае врз целокупниот спектар на билатералните односи.