Најмалку 50 загинати во уривање на рудник за злато во Централноафриканската Република

Речиси 50 лица се потврдени за мртви по лизгањето на земјиштето оваа недела на локација за ископ на злато во западниот дел на Централноафриканската Република, соопштија денес властите, јавува Анадолу.

Инцидентот се случи во вторникот во селото Замбоје во префектурата Нана-Мамбере, во близина на границата со Камерун.

Меѓу потврдените, мртви се 34 граѓани на Централноафриканската Република, 13 Камерунци и две лица од Чад, изјави министерот за рудници и геологија Руфин Бенам-Белтунгу за новинарите во Банги.

Тој рече дека властите наредиле затворање на ископот додека продолжуваат операциите за пребарување на луѓе што можеби сè уште се затрупани.

Снимките споделени на социјалните мрежи покажуваат дека дел од пространата рударска локација се урнал. Првичните извештаи го проценуваа бројот на загинати на околу 100.

Се наведува дека рударството е главен извор на егзистенција за младите луѓе во регионите богати со минерали во земјата.

На 8 јуни, во друго свлечиште на рударско место во Кињеме, во истиот регион, загинаа најмалку осум лица, а повеќе од десетина се водат како исчезнати, според локалните медиуми.

Се вели дека ископот често се врши рачно и може да биде неколку метри длабоко под земја.