Владата на национално единство на Либија ги суспендира сите преговори со Хафтар

ТРИПОЛИ

Премиерот на меѓународно признатата Влада на национално единство на Либија, Фајез ал Сарај, ги суспендира сите мировни преговори кои под закрилата на Обединетите нации (ОН) таа Влада ги водеше со лидерот на нелегитимните сили од истокот на Либија, генерал Калифа Хафтар, пренесува Агенција Анадолија (АА).

Ал Сарај за либиската телевизија „Ал Ахрар“ изјави дека се суспендирани сите политички, економски и воено-мировни преговори, вклучувајќи ги и оние што во Женева ги водеше петчлена делегација.

Тој додаде дека одлуката за прекин на мировните преговори е донесена поради постојаните кршења на договорениот прекин на судирите во Либија.

Милитантите лојални на пучистичкиот лидер Хафтар вчера двапати изведоа ракетни напади врз пристаништето во Триполи, во кои се убиени 3, а ранети се 5 цивили.

- Состојбата во Либија

Либија се наоѓа во длабока политичка и безбедносна криза уште од 2011 година, кога од власта е симнат Муамер ел Гадафи.

Нелегитимните сили предводени од генерал Калифа Хафтар во април минатата година започнаа напад на Триполи во кој се наоѓа седиштето на меѓународно признатата Влада на национално единство на Либија.

Во Москва на 14 јануари се одржаа мировни преговори кои завршија неуспешно, бидејќи Хафтар ги напушти преговорите. Пет дена подоцна во Берлин е одржана нова мировна конференција на која е заклучено дека во Либија е можно исклучиво мирно решение на кризата.

Формирана е Заедничка воена комисија составена од 5 делегати на либиската Влада и 5 од таборот на Хафтар. Таа комисија ги водеше мировните преговори во Женева. Хафтаровите сили и по таа конференција продолжија со нападите на Триполи.