Во израелски воздушен напад оштетен автобус на „Лекари без граници“ во Газа, повреден е член на персоналот

Во израелски воздушен напад е оштетен автобус на „Лекари без граници“ (MSF) во Газа, при што е повреден еден член на персоналот, соопшти вчера хуманитарната медицинска организација, јавува Анадолу.

„Лекари без граници“ соопшти дека автобусот превезувал 10 хуманитарни работници кога на 13 септември во израелски напад било погодено возило кое било цел, на само два метра од автобусот.

Организацијата наведе дека автобусот бил јасно препознатлив, со големо лого на „Лекари без граници“ видливо на покривот.

„Израелските сили уште еднаш покажаа флагрантно непочитување на безбедноста на хуманитарниот и медицинскиот персонал“, соопшти „Лекари без граници“.

Организацијата истакна дека никаде во Газа не е безбедно и повика на заштита на цивилите, здравствените работници и хуманитарниот персонал.

Исто така, повика јасно означените медицински и хуманитарни возила да бидат поштедени од напади.

Според најновите податоци на Министерството за здравство во Газа, до вчера во израелските прекршувања на договорот за прекин на огнот се убиени 1.372 Палестинци, а 4.659 се повредени.

Од 8 октомври 2023 година, Израел уби повеќе од 73.000 Палестинци и повреди над 174.000 во неговата геноцидна кампања во Газа, при што се уништени околу 90 отсто од инфраструктурата на енклавата.