Во израелските напади убиени 34.683 Палестинци во Газа од 7. октомври

ГАЗА (АА) - Најмалку 34.683 Палестинци се убиени во израелските напади на Појасот Газа од 7. октомври минатата година, соопшти денес Министерството за здравство во опколената палестинска енклава, известува Анадолу.

Палестинското министерство информираше дека во истиот период се повредени 78.018 Палестинци.

„Во израелските напади последните 24 часа се убиени 29 Палестинци, а ранети се 110. Многу луѓе сѐ уште се заробени под урнатините и на патиштата бидејќи екипите не можат да дојдат до нив“, соопшти министерството.

Според податоците на Обединетите нации, израелските напади врз палестинската енклава принудија 85 отсто од населението на Појасот Газа внатрешно да се раселат, предизвикувајќи акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.