Во најновите израелски воздушни напади во Либан убиени најмалку седум лица

БЕЈРУТ (АА) - Најмалку седум лица се убиени, а три се повредени во новите израелски воздушни напади врз Либан, јавуваат денес либанските медиуми, пренесува Анадолу.

Израелски воени авиони извршија напад врз куќа во градот Деир Ел-Захрани во Набатије, при што загинаа три лица, јави државната новинска агенција ННА.

Уште три лица се убиени, а три се повредени во друг напад врз градот Сохмор во долината Бека во Источен Либан, соопшти новинската агенција.

Според овој извор, во напад со беспилотно летало врз мотоцикл во Араја, во западниот дел на Бека, е убиено едно лице. Израелско артилериско гранатирање е забележано и во јужниот град Чихине, а либанските медиуми известуваат дека во нападот се употребени гранати со меѓународно забранет бел фосфор.

Според меѓународното хуманитарно право, употребата на бел фосфор се смета за незаконска во населените области.

Во меѓувреме, копнените судири меѓу борците на Хезболах и израелските сили продолжија во градот Хијам во Јужен Либан, поради израелските обиди да напредуваат во градот.

Минатиот месец Израел започна голема воздушна кампања во Либан против, како што тврди, позиции на Хезболах што претставува ескалација на едногодишната прекугранична војна меѓу Израел и групата од почетокот на израелската брутална офанзива врз Газа.

Според либанските здравствени власти, убиени се над 2.800 луѓе, а речиси 12.900 се повредени во израелските напади врз Либан од октомври минатата година.

Израел го прошири конфликтот на 1 октомври со започнување копнен упад во Јужен Либан.