Во судирите во Мали загинаа 10 војници, 46 терористи се неутрализирани

АНКАРА (АА) - Вооружените сили на Мали вчера објавија дека десет војници загинале во судирите со терористите во југоисточниот дел на земјата, јавува Анадолу.

„Вооружените сили спречија напад со автомобил бомба во градот Бурем“, се вели во соопштението.

Во соопштението се наведува дека ситуацијата е под контрола, a преживеаните терористи побегнале во северните делови на регионот Агамор и Амустарат.

Малиската Армија соопшти дека во судирите загинале десет војници, а 13 се ранети.

„Вооружените сили неутрализираа 46 терористи и уништија 20 нивни возила“, се наведува во соопштението.

Минатата недела најмалку 49 цивили и 15 војници беа убиени во два одвоени терористички напади во западноафриканската земја, соопштија властите.

Според соопштението на Владата, на 7 септември патнички брод покрај реката Нигер бил нападнат околу пладне, по што следувал втор напад на позиција на Армијата во североисточниот регион Гао. Во судирите со Армијата беа „неутрализирани“ и 50 напаѓачи.

Таканаречената Група за поддршка на исламот и муслиманите (ГСИМ), поврзана со терористичките организации Ал Каеда и ДЕАШ, ја презеде одговорноста за двата напади.

Милитантните и терористичките организации гаѓаат војници и цивили во северните и централните региони на Мали од 2012 година.

Во текот на изминатите 15 години, жртвите во терористичките напади во африканскиот регион Сахел, вклучително и Мали и Нигер, се зголемени за над 2.000 отсто, според извештајот објавен претходно оваа година.

„Регионот Сахел во супсахарска Африка сега е епицентар на тероризмот со повеќе смртни случаи од тероризам во 2022 година отколку Јужна Азија и Блискиот Исток и Северна Африка (МЕНА) заедно“, се вели во Глобалниот индекс на тероризам за 2023 година објавен од Институтот за економија и мир со седиште во Австралија.

При рангирањето на земјите најпогодени од тероризмот, Мали беше рангиран на четвртото место, Нигерија беше осма, а Нигер беше на 10-то место.