Германските власти откриле складиште на оружје во близина на Берлин „поврзано со руски шпиони“

Германските власти открија скриено оружје поврзано со руските разузнавачки служби на периферијата на Берлин, објавија денес јавните сервиси НДР и ВДР, пренесува Анадолу.

Службата за внатрешно разузнавање на Германија, БфВ, проценува дека оружјето - пронајдено во шума во близина на главниот град - било скриено за руски шпиони, на кои Москва би можела да им нареди да извршат напади, се вели во извештаите.

Професионално скриеното оружје првпат било откриено изминатата есен откако властите добиле дојава, според извештајот. Откако го провериле, властите го оставиле скриеното оружје недопрено некое време и го следеле местото со надеж дека ќе ги идентификуваат организаторите или некој што би дошол да го земе оружјето.

Минатата есен во врска со оружјето бил уапсен осомничен во Романија, се вели во извештаите. Германските безбедносни власти веруваат дека тоа е човекот што го оставил скриеното оружје. Федералното јавно обвинителство го истражува случајот од ноември под сомнение за подготовка на сериозен чин на насилство што ја загрозува државата.

Ниту германските власти ниту руската Амбасада во Берлин немаат издадено официјално соопштение за обвинувањата.