Грмотевици предизвикаа поплави, предупредувања за патување низ Англија и Велс

Големи делови од Англија и Велс денес се под жолто предупредување за временските услови, обилни врнежи од дожд и грмотевици се закануваат со поплави и прекини во сообраќајот, јавува Анадолу.

Предупредувањето од Метеоролошката служба, кое е во сила од денес напладне, го опфаќа поголемиот дел од Велс, како и Западен Мидлендс, Јоркшир и Хамбер, Југозападна Англија, Северозападна Англија, Североисточна Англија, Лондон, Југоисточна Англија, Источна Англија и Источен Мидлендс.

„Иако во многу области ќе изостанат најобилните врнежи, во текот на попладнево и навечер се очекува развој на обилни врнежи и грмежи“, соопшти Британската метеоролошка служба.

Националната метеоролошка служба соопшти дека северниот дел на Англија и најголемиот дел од Велс ќе бидат главно погодени од невремето во раните попладневни часови, по што тоа ќе се прошири кон централните и источните делови на Англија.

Во некои области може да паднат 10-20 милиметри дожд во краток период, со можност за 30-40 мм во подрачја со повторливи врнежи од дожд. Можни се и грмотевици и град.

Предупредувањето значи дека некои домови и бизниси би можеле да бидат поплавени, додека железничките услуги може да се соочат со доцнења, а патувањата со автомобил би можеле да траат подолго.

Влажно време се очекува и утре, при што само на крајниот североисток од Шкотска веројатно ќе бидат целосно избегнати врнежи од дожд.

Посетителите на фестивалите и други настани, како Рединг, Лидс и Кримфилдс, исто така се предупредени за силни ветрови. Налети до 56 километри на час се можни по должината на јужниот брег утре.