Деца и бремена жена меѓу 7-те убиени во израелските напади врз Газа

ИСТАНБУЛ (АА) – Најмалку седум лица, вклучувајќи деца, бремена жена и нејзиното неродено дете, беа убиени, а неколку други повредени во израелски воздушен напад извршен во текот на ноќта врз стан во населбата Тел ал-Хава во градот Газа рано утринава, според официјалната палестинска новинска агенција ВАФА, јавува Анадолу.

Одделно, израелските сили нападнаа амбулантно возило во близина на болницата за рехабилитација „Хамад“ во северозападниот дел на Газа, при што беа повредени членови на медицинскиот тим, според медицински извори цитирани од новинската агенција.

Израел уби повеќе од 59.100 Палестинци, повеќето од нив жени и деца, во Појасот Газа од октомври 2023 година. Воената кампања ја опустоши енклавата, го уништи здравствениот систем и доведе до сериозен недостиг на храна.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид во Меѓународниот суд за правдата за неговата војна во енклавата.