Ел Нињо би можел да биде „најсилен досега“, предупредува британската метеоролошка агенција

Феноменот Ел Нињо што се развива над Тихиот Океан најверојатно ќе биде „најсилен досега“, предупреди денес британската Метеоролошка служба, а оваа појава потенцијално би можела да ја направи 2027 година најтопла година досега, јавува Анадолу.

Моќниот природен климатски феномен ги зголемува глобалните температури и ризикот од екстремни временски појави, а во комбинација со последиците од климатските промени предизвикани од човековата активност, британската Метеоролошка служба предупреди дека е „многу веројатно“ 2027 година да стане најтоплата година досега на глобално ниво.

„Треба да биде јасно дека ова е настан без преседан“, изјави Адам Скејф, раководител за долгорочно прогнозирање во британската Метеоролошка служба, за „Би-би-си“.

Тој додаде: „Никогаш не сум видел сигнал за Ел Нињо со ваков интензитет во нашите прогнози“.

Најновите прогнози на Метеоролошката служба укажуваат дека овие температурни аномалии би можеле да надминат 3 степени Целзиусови подоцна оваа година, кога Ел Нињо ќе се приближи до својот врв.

„Имаме уште многу месеци додека овој феномен продолжува да се развива и тоа е една од причините поради кои имаме зголемена доверба дека ова ќе биде настан што ќе постави рекорди“, рече Зик Хаусфатер, климатски научник во американската истражувачка група „Беркли ерс“.