Израелската армија ги бара останките на заложниците во Газа преку „жолтата линија“

ЕРУСАЛИМ/ИСТАНБУЛ (АА) - Израелската армија спроведува пребарувања надвор од „жолтата линија“ во Појасот Газа за да ги пронајде останките на заложниците, објави јавниот сервис КАН, пренесува Анадолу.

КАН, повикувајќи се на безбедносен извор, доцна синоќа објави дека пребарувањата на телата на заложниците се одвиваат во областите контролирани од армијата во рамките на „жолтата линија“, нефизичка линија на разграничување до која израелските трупи се повлекоа во Газа според договорот за прекин на огнот постигнат претходно овој месец.

„Жолтата линија“ се протега од југот на северна Газа до периферијата на Рафа во јужниот дел на Појасот Газа.

Операциите се спроведуваат врз основа на „разузнавачки проценки“ што укажуваат на можноста за пронаоѓање тела таму, истакна изворот.

„Почнувајќи од денес (недела), на тешки инженерски возила ќе им биде дозволено да влезат во Газа за да се забрзаат операциите за пребарување“, рече изворот, без да даде дополнителни детали.

Лидерот на Хамас, Халил ал-Хаја, во интервју изјави дека групата ќе влезе во повеќе области во Појасот Газа во недела за да продолжи со пребарувањата по останки на израелски заложници.

Од 13 октомври, Хамас ги ослободи 20-те живи израелски заложници и ги врати телата на 16 други, оставајќи 12, како дел од договорот за прекин на огнот што стапи на сила на 10 октомври.

Во израелската геноцидна војна од октомври 2023 година убиени се над 68.000 Палестинци, а повеќе од 170.000 се повредени, според податоците на Министерството за здравство на Газа.