Израелски напад врз центар на ОН за хуманитарна помош во северна Газа

ГАЗА / АНКАРА (АА) - Четворица Палестинци се убиени, а повеќемина се ранети вечерва во израелски воздушен напад врз објект за дистрибуција на хуманитарната помош на Агенцијата за бегалци на Обединетите нации, кој е лоциран веднаш до засолниште за раселени лица во северниот дел на Појасот Газа, јавува Анадолу.

Медицински извор за Анадолу изјави дека најмалку четворица Палестинци се убиени, а повеќемина се повредени кога израелската армија го бомбардирала центарот за хуманитарна помош на УНРВА во бегалскиот камп Џабалија.

Дописникот на Анадолу јави дека објектот бил во близина на поранешна клиника на УНРВА, која била претворена во засолниште за раселени семејства откако престанала со работа поради претходно нејзино бомбардирање.

Очевидци за Анадолу изјавија дека во тек се напорите за спасување на повредените Палестинци во нападот.

Речиси 52.800 Палестинци се убиени во Газа во бруталната израелска офанзива од октомври 2023 година, повеќето од нив жени и деца.

Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговите воени дејства во енклавата.