Sinan Doğan
12 Мај 2024•Ажурирај: 15 Мај 2024
БОГОТА (АА) - Колумбискиот претседател Густаво Петро го критикуваше израелскиот премиер Бенјамин Нетанјаху велејќи дека тој „ќе влезе во историјата како извршител на геноцид“, јавува Анадолу.
„Господине Нетанјаху, ќе влезете во историјата како извршител на геноцид. Фрлањето бомби врз илјадници невини деца, жени и постари лица не ве прави херој“, рече тој во објава на X како одговор на обвинувањата од страна на Нетанјаху за антисемитизам.
„Вие ќе бидете покрај оние кои убија милиони Евреи во Европа. Геноцидот, без разлика дали е поврзан со религија или не, е геноцид. Барем престанете со налетот што продолжува“, рече тој.
- „Ако Газа умре, умира и човештвото“ -
Во претходна објава, Петро рече: „Како што е неприфатлив геноцидот извршен врз Евреите во нацистичка Европа, исто така неприфатлив е и моменталниот геноцид над палестинскиот народ. Јас сум секуларен, републиканец и поддржувач на обичните луѓе“.
Додавајќи дека не е поддржувач на Хамас, Петро рече дека неговите демократски, обични, секуларни и религиозни принципи го навеле да застане против геноцидот и нехуманото варварство на Нетанјаху.
„Ако Газа умре, умира и човештвото“, додаде тој.
Колумбија ги прекина дипломатските односи со Израел на 3 мај поради тековните напади врз Палестинците во Газа, каде Израел уби речиси 35.000 Палестинци како одговор на упадот на Хамас на 7 октомври 2023 година, кој однесе 1.200 животи.
Меѓународниот суд на правдата во јануари утврди дека е „веродостојно“ дека Израел извршил дела кои ја прекршуваат Конвенцијата за геноцид од 1948 година. Во привремената наредба, судот наложи дека Израел мора да се погрижи неговите сили да не вршат ниту едно од дејствата забранети со Конвенцијата. Случајот, кој го подигна Јужноафриканската Република, е во тек во Хаг.
