Над 300 загинати во лизгање на земјиштето во Папуа Нова Гвинеја

АНКАРА (АА) - Бројот на загинати од масовното лизгање на земјиштето на северот на Папуа Нова Гвинеја се искачи на повеќе од 300, соопшти денес член на Парламентот, јавува Анадолу.

При потврдувањето на најновиот биланс на загинати, Аимос Акем, пратеник од провинцијата Енга, рече дека лизгањето на земјиштето што го погоди регионот Маип-Мулитака во раните утрински часови вчера, уништило и 1.182 куќи во Рурал ЛЛГ областа, јави локалниот дневен весник ПНГ Пост Курир.

Според извештаите од теренот, тој рече дека лизгањето на земјиштето затрупало повеќе од 300 луѓе и опустошило шест села во регионот.

Свлечиштето го уништи селото Јамбили во провинцијата Енга, кое се наоѓа на над 600 километри северозападно од главниот град Порт Морезби.

Марк Ипуја, локален лидер и поранешен пратеник од регионот, рече дека селото Јамбали е покриено со големи купишта карпи предизвикани од смртоносното лизгање на земјиштето што се случи околу 3 часот наутро (17:00 GMT четврток).

Локалните власти сѐ уште не го потврдија бројот на загинати.

Свлечиштето го блокираше и патот кој води до градот Поргера, во кој се наоѓа голем рудник за злато.

САД и Австралија понудија помош за владата на Папуа Нова Гвинеја.

Претседателот Џо Бајден и неговата сопруга преку порака ја изразија својата загриженост за луѓето погодени од несреќата.

Австралиската министерка за надворешни работи Пени Вонг рече дека Канбера е подготвена да ѝ помогне на Владата.