Најмалку 128 лица и натаму се водат како исчезнати по потонувањето на траектот во Индонезија, 109 се спасени

Најмалку 128 лица и натаму се водат како исчезнати откако траект потона во Јаванското Море во Индонезија, 109 лица се спасени, а потврдена е смрт на шест лица, објавија локалните медиуми денес, пренесува Анадолу.

Индонезиската Национална агенција за пребарување и спасување (Басарнас) соопшти дека се пронајдени 115 од вкупно 243 патници и членови на екипажот на бродот „Вирго Транспорт8“, јави државната новинска агенција Антара.

Пловилото потона во раните утрински часови во неделата во водите кај Тањунг Селатан, во Јужен Калимантан, во близина на островот Масалембу.

Властите во Јужен Калимантан организираат преживеаните да се вратат во своите домови откако ќе бидат медицински и психолошки подготвени за патување.

„Откако разговаравме со нив, повеќето од преживеаните рекоа дека сакаат што поскоро да се вратат дома“, изјави гувернерот на Јужен Калимантан, Мухидин, според Антара.

Властите им помагаат и на преживеаните што ги изгубиле личните документи да добијат полициски потврди потребни за купување авионски билети.

Петнаесет преживеани остануваат хоспитализирани во Банджармасин, од кои шест во регионалната општа болница „Улин“, седум во болницата „Бхајангкара“ и двајца во болницата „Султан Суријансијах“.

Уште 59 патници што се во добра здравствена состојба привремено се сместени во објекти обезбедени од покраинската Влада.

Операциите за пребарување и спасување продолжуваат во потрага по лицата што сè уште се водат како исчезнати, а во напорите за пронаоѓање на исчезнатите патници и членови на екипажот вклучени се Басарнас и други индонезиски институции.