Најмалку 132 лица загинаа денес откако силен земјотрес со јачина од 7,4 степени го погоди западниот дел на Колумбија, при што се урнаа објекти и беа активирани големи спасувачки операции во повеќе градови, јавува Анадолу.
Најмалку 570 лица се повредени, соопшти Колумбиската асоцијација на главни градови.
Колумбискиот претседател Абелардо де ла Есприела претходно изјави дека во земјотресот се оштетени 1.575 домови, од кои 37 целосно се уништени, како и 61 објект, 18 здравствени центри, 52 образовни центри, 17 центри во заедницата и 18 патишта.
Колумбиската Влада прогласи состојба на национална катастрофа со цел зајакнување на мобилизацијата и координацијата на институционалните капацитети за справување со вонредната состојба.
Земјотресот се случил во 7:34 часот по локално време (12:34 часот по Гринич), со епицентар на околу пет километри источно од градот Сан Хозе дел Палмар, соопшти Американскиот геолошки институт (USGS). Според Институтот, земјотресот се случил на длабочина од 107 километри.
Последователен потрес со магнитуда од 5,0 степени бил регистриран во 8:18 часот (13:18 часот по Гринич), на околу 16 километри западно од Сан Хозе дел Палмар. Општината, која се наоѓа во департманот Чоко, има околу 4.800 жители и се наоѓа на надморска височина од 1.288 метри.
И покрај силата на земјотресот, Американскиот центар за предупредување од цунами соопшти дека не се очекува цунами во американските сојузни држави Калифорнија, Орегон, Вашингтон или Алјаска, ниту во канадската провинција Британска Колумбија.
Колумбиските власти соопштија дека нема опасност од цунами покрај колумбискиот брег на Пацификот.
„Државата е присутна и презема мерки“, изјави претседателот Де ла Есприела по земјотресот, потврдувајќи дека директно го презел раководењето со одговорот на вонредната состојба. Тој нареди итно формирање единствен команден центар за координација на спасувачките и другите активности.
Де ла Есприела побара сеопфатен извештај од директорот на Националната единица за управување со ризици од катастрофи за состојбата во градот, кој се наоѓа на околу 240 километри западно од главниот град Богота.
Претседателот претходно изјави дека ќе отпатува во градот Перејра за да им даде поддршка на погодените и да го следи одговорот на Владата, но подоцна соопшти дека се упатува кон Богота за да се посвети на справувањето со вонредната состојба.
Според Колумбиската асоцијација на главни градови, до 11:30 часот по локално време (16:30 часот по Гринич) биле регистрирани 40 жртви во Рисаралда, 27 во Ваље дел Каука и четири во Чоко.
Градоначалникот на Перејра, Маурисио Салазар, потврди дека најмалку 18 лица загинале во градот.
Во Ваље дел Каука, гувернерката Дилијан Франсиска Торо соопшти дека се пријавени најмалку 27 загинати.
Во Манисалес, градоначалникот Хорхе Едуардо Рохас соопшти дека најмалку две лица загинале, а повеќе од 32 објекти целосно или делумно се урнале. Властите во Манисалес ги суспендираа сите наставни активности и пријавија истекување на гас и електрична енергија.
Во Кибдо, според првичните извештаи, едно лице загинало, а има и повредени и сериозно оштетени објекти.
Во Чоко, по земјотресот се пријавени четири загинати и 69 повредени лица, изјави гувернерката Нубија Каролина Кордоба Кури.
Колумбиската управа за цивилно воздухопловство соопшти дека е оштетен аеродромот „Алфонсо Бониља Арагон“ во Кали и го додаде на списокот на погодени терминали.
Воздушниот сообраќај на аеродромот во Попајан е суспендиран поради вулканска пепел од вулканот Пурасе по сеизмичката активност.
Претходно, поради процена на структурната стабилност, беа прекинати операциите и на аеродромите во Перејра, Манисалес, Кибдо, Арменија, Картаго и Буенавентура.
- Локална реакција
Гувернерката на Чоко, Кордоба Кури, потврди дека во главниот град на департманот, Кибдо, е причинета сериозна структурна штета.
Пожарникарите во Кибдо соопштија дека луѓе се заробени во оштетените објекти, додека градоначалникот на Кали, Алехандро Едер, изјави дека во градот се урнале најмалку 20 објекти и дека има луѓе заробени во нив.
Во Манисалес, главниот град на департманот Калдас, земјотресот предизвика значителни разурнувања. Снимките објавени на социјалните мрежи покажаа дека една од главните кули на познатата градска катедрала претрпела сериозно структурно оштетување и се навалила кон централниот дел на објектот.
Градоначалникот на Меделин, Федерико Гутијерес, потврди дека тимовите за управување со ризици од катастрофи активно вршат процена на штетите.
Во Богота се огласија сирените за тревога, по што илјадници канцелариски работници и жители излегоа на улиците. Градоначалникот Карлос Фернандо Галан изјави дека во главниот град нема сериозни структурни оштетувања и дека градот е подготвен да им помогне на најпогодените подрачја, при што 100 спасувачи веќе се подготвени да заминат во погодениот регион.
Националната агенција за инфраструктура соопшти дека тунелот Сумапас и мостот Маријано Оспина во моментов се затворени додека се вршат инспекции за процена на состојбата на инфраструктурата.
Земјотресот бил почувствуван и надвор од границите на Колумбија, при што силни потреси биле регистрирани во соседните Еквадор и Панама.
Властите во погодените департмани продолжуваат да го проценуваат целосниот обем на човечките жртви и материјалната штета.
Според експертите, ова е еден од најсилните земјотреси регистрирани во земјата во овој век.
Американската Амбасада во Богота соопшти дека внимателно ја следи ситуацијата и ги повика американските граѓани да ги следат локалните вести и да одржуваат комуникација со своите семејства.
Американскиот државен секретар Марко Рубио изјави дека администрацијата на американскиот претседател Доналд Трамп внимателно ја следи состојбата со земјотресот и дека е подготвена да му помогне на народот на Колумбија.
