Aida Cako
26 Јануари 2026•Ажурирај: 27 Јануари 2026
ГАЗА (АА) – Палестинските семејства во Појасот Газа се соочуваат со сериозна електроенергетска криза предизвикана од уништената инфраструктура како последица на израелските напади, што ги принудува да користат импровизирани средства за осветлување во секојдневниот живот, јавува Анадолу.
Во Газа, многу домаќинства, меѓу кои и семејството Абу Лабда, живеат во објекти без електрична енергија и без основни услови за живот.
Поради речиси две и пол години постојани или речиси постојани прекини на струјата, тие се потпираат на примитивни ламби направени од празни лименки, парчиња памук и мали количини масло.
Овие импровизирани светилки се единствен извор на светлина во вечерните часови, кога темнината целосно ги обвива домовите.
Недостигот на стабилно осветлување сериозно го отежнува секојдневието, особено за децата, кои се принудени да учат под слаба и треперлива светлина.
Затворените гранични премини и строгите ограничувања за внесување алтернативни извори на енергија дополнително ја влошуваат состојбата.
Поради тоа, жителите немаат пристап до гориво, електрични генератори или соларна опрема, што би можело да им помогне да обезбедат минимално ниво на електрична енергија.
Хуманитарната состојба во Газа продолжува да се влошува, а недостигот на струја негативно влијае врз здравството, образованието и основните животни услови. Многу семејства се принудени да се приспособуваат на екстремни услови, користејќи примитивни решенија за да ја одржат секојдневната рутина.
