Одложена испораката на системи ХИМАРС од САД за Литванија

Испораката на американските ракетни системи со висока мобилност (ХИМАРС) во Литванија е одложена, изјави началникот на Генералштабот на оваа балтичка земја, јавува Анадолу.

„Испораката на ХИМАРС е одложена. Во моментов не можам да кажам за колку време. Тоа целосно зависи од американската страна, а веројатно е поврзано со нивната индустрија“, изјави Раимундас Ваикснорас за јавниот сервис ЛРТ.

Тој рече дека литванските екипажи веќе ја завршиле обуката и вежбите со бојно гаѓање и го очекуваат пристигнувањето на системите.

Кон крајот на 2022 година, Литванија потпиша договор вреден 495 милиони долари со САД за набавка на осум ракетни системи ХИМАРС. Во април, Вилнус потпиша и дополнителен договор за набавка на втора батерија, вреден 280 милиони долари.

Првично се очекуваше системите да пристигнат до крајот на оваа година.

Ваикснорас изјави дека постојат договори кои овозможуваат привремено префрлање на идентични системи во Литванија доколку дојде до одложување на испораката.

„Тие би можеле да пополнат одредени празнини во капацитетите“, рече тој, додавајќи дека Литванија постигнала договор со Националната гарда на Мичиген за можно привремено распоредување на такви системи.

„Тие ги поседуваат истите системи и можат да дојдат на нашите вежби“, додаде тој.

Осврнувајќи се на загриженоста дали планираната национална дивизија на Литванија ќе може да постигне целосна оперативна способност до 2030 година, Ваикснорас рече дека ризиците се под контрола.

Министерот за одбрана, Роберт Каунас, призна дека некои инфраструктурни проекти би можеле да доцнат, но истакна оти не постои значителна закана за исполнување на целта поставена за 2030 година.