ОН предупредуваат за извршените големи злосторства во Мјанмар

ЖЕНЕВА (АА) - Нагазните мини поставени на границата помеѓу Мјанмар и Бангладеш ги убиваат и осакатуваат муслиманите Рохинџа, кои бегаат од насилствата и прогонот во Аракан, предупреди денес висок претставник на ОН, јавува Anadolu Agency (AA).

Марзуки Дарушман, претседател на Меѓународната мисија за откривање факти за Мјанмар, исто така рече дека муслиманите Рохинџа се соочени со големи злосторства и биле предмет на дехуманизирачка пропаганда.

Говорејќи на 36. Заседание на Советот за човекови права на ОН во Женева, Дарушман рече: „Постојат извештаи за поставени нагазни мини на границата со Бангладеш, кои ги осакатуваат и ги убиваат оние што се обидуваат да избегаат од насилството, вклучувајќи ги и децата“.

„Постојат и извештаи за дехуманизирачка пропаганда што ги поистоветува Рохинџа муслиманите со штетниците“.

Претставникот на ОН за Мјанмар рече дека над 420.000 луѓе побарале засолниште во Бангладеш за помалку од еден месец, а речиси 200 села на араканските муслимани во погодената област се испразнети.

Мјанмар беше повикан да гарантира целосен пристап во земјата, со цел истражителите да ги испитаат добиените наводи.

„Стапивме во контакт со Владата на Мјанмар, барајќи соработка со нас и целосен и непречен пристап во земјата“, рече Дарушман.

Дарушман, исто така, апелираше до Советот за човекови права на ОН да го продолжи неговиот мандат за шест месеци, до септември 2018 година, за да го испита насилството во Мјанмар.

Според ОН, од 25 август, околу 410.000 Рохинџа муслимани преминале од западната држава Аракан (Мјанмар) во Бангладеш.

Рохинџа муслиманите бегаат од новите операции на безбедносните сили во кои заедно со будистичките банди убиваат мажи, жени и деца, ограбуваат домови и ги палат нивните села. Според Бангладеш, околу 3.000 Рохинџа муслимани се убиени во операциите.

Турција е предводник во обезбедувањето помош за бегалците Рохинџа, а претседателот Реџеп Таип Ердоган рече дека ова прашање ќе го отвори во ОН.

Рохинџа муслиманите, кои според ОН се најпрогонуваното етничко малцинство во светот, стравуваат од напади, по убивањето на десетици лица во насилствата во 2012 година.

Минатиот октомври, како резултат на нападите на пограничните пунктови во Аракан, безбедносните сили започнаа петмесечни операции во кои беа убиени околу 400 Рохинџа муслимани.

ОН документираа масовни силувања, убиства – вклучувајќи и убиства на бебињата и мали деца – брутално претепување и исчезнувања извршени од страна на безбедносните сили. Во извештајот, истражувачите на ОН рекоа дека таквите насилства претставуваат злосторства против човештвото.