Пакистан „остро“ го осуди нападот на Хусите врз невоен брод во Црвеното Море како прекршување на меѓународното право

Пакистан денес „остро“ го осуди нападот на Хусите врз невоен комерцијален брод во Црвеното Море, во кој загинаа тројца пакистански државјани, оценувајќи го како прекршување на меѓународното право и закана за поморската безбедност, јавува Анадолу.

„Ваквите напади ги загрозуваат животите на невини луѓе, претставуваат прекршување на меѓународното право и се сериозна закана за непречено пловење“, изјави пакистанскиот министер за надворешни работи Ишак Дар во соопштение.

Во нападот е повреден уште еден пакистански државјанин.

Загинаа вкупно шест лица, а 10 беа повредени вчера кога Хусите нападнаа комерцијален брод што превезувал прехранбени производи во теснецот Баб ел-Мандеб.

Дар рече дека Исламабад е во контакт со надлежните саудиски власти, како и со меѓународно признатата Влада на Јемен, со цел да се утврдат дополнителни детали за инцидентот и околностите во кои се случил.

Тој ѝ наложи на Амбасадата на Пакистан во Ријад „веднаш“ да ги координира активностите со надлежните власти и да ги преземе сите неопходни мерки за преземање и репатријација на посмртните останки на загинатите пакистански државјани, како и за обезбедување на сета можна помош на повредениот пакистански државјанин.

„Внимателно ја следиме ситуацијата и ќе продолжиме да одржуваме близок контакт со надлежните власти“, додаде тој.