Поранешниот еврокомесар Бретон: Иран ги држи клучевите на војната

Поранешниот еврокомесар Тјери Бретон денес изјави дека Иран ги држи „клучевите на војната“, нагласувајќи дека повторното отворање на Ормускиот Теснец зависи од волјата на Техеран и покрај заканите од американскиот претседател Доналд Трамп, пренесува Анадолу.

„Оние кои ги држат клучевите се Иранците, сакале ние тоа или не“, изјави Бретон за француската телевизија БФМ ТВ.

Тој оцени дека Техеран се наоѓа во позиција на сила, посочувајќи дека Иранците се организирале сами и дека не се сами во конфликтот, при што Кина обезбедува компоненти и експертиза.

Бретон нагласи дека Иран „влегол во асиметрична војна“ со, како што рече „најдобрата армија во светот“, но предупреди дека резервите на САД се намалуваат.

„Од почетокот на конфликтите, потрошен е еквивалент на двегодишно производство на ракетниот систем ‘Патриот’. Пентагон почнува да се загрижува“, додаде тој.

Тој истакна дека Техеран се подготвувал за вакво сценарио повеќе од 40 години, додавајќи дека Трамп се соочува со притисок, особено од гласачите.

Ескалацијата во регионот се интензивираше откако САД и Израел започнаа заедничка офанзива врз Иран на 28 февруари, во која досега загинаа повеќе од 1.400 луѓе, меѓу кои и тогашниот врховен лидер, ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази, предизвикувајќи жртви и уништување на инфраструктурата, истовремено нарушувајќи ги глобалните пазари и авиосообраќајот.