Претседателот на Перу го распушти Парламентот, одговорен за изгласување на неговата смена

БОГОТА (АА) - Перу е средиште на длабока политичка криза која се огледа во спротивните потези на претседателот на државата, Мартин Вискара, и Конгресот, во кој мнозинство има опозицијата, јавува Anadolu Agency (AA).

Кризата ја предизвика именувањето на новиот судија на Уставниот суд, Гонсало Ортис, кој е прв братучед на претседателот на Конгресот, Педро Олачеа.

Претседателот на Перу, Вискара, поради тоа го распушти Парламентот и најави предвремени избори, а Конгресот ја продолжи седницата и изгласа отповикување на претседателот.

Заменик-претседателката на Перу, Мерседес Араос, потоа положи заклетва пред Конгресот како привремена претседателка на земјата.

Вооружените сили на Перу застанаа на страната на претседателот Вискара.

Од Кабинетот на Вискара е соопштено дека командантите на копнените, воздухопловните и поморските сили на земјата, како и највисоките официјални претставници на полицијата го посетиле Вискара и му дале поддршка во „трилерот“ кој на политичката сцена на Перу се случуваше во изминатите 24 часа.