Претставничкиот дом на САД одобри нов пакет помош од 300 милиони долари за Украина

ИСТАНБУЛ (АА) - Претставничкиот дом на Соединетите Американски Држави (САД) одобри предлог-закон за нов пакет помош од 300 милиони долари за Украина, јавува Анадолу.

Претставничкиот дом гласаше за предлог-законот за кој се издвоени средства од буџетот на Пентагон.

На гласањето доцна синоќа, предлог-законот е одобрен со 311 гласови „за“ наспроти 117 гласа „против“.

Вклучувањето на помошта за Украина во буџетот на Пентагон за 2024 година предизвика тензии меѓу републиканците и демократите.

Претставничкиот дом го одобри буџетот од 826 милијарди долари за Пентагон, откако помошта за Украина беше тргната од пакетот.

Домот го одобри и буџетот за Стејт департментот.

Американската Влада се соочува со закана од прекин на работата поради буџетските несогласувања меѓу републиканците и демократите.

- Што значи „блокада (запирање) на работата на Владата?“ -

Според американските закони, доколку Конгресот не може навремено да го одобри буџетот за целата фискална година, која започнува на 1 октомври, а завршува на 30 септември, периодот до неговото одобрение мора да биде покриен со привремени буџети.

За време на периодите кога привремениот буџет не е одобрен, федералната влада го губи овластувањето за трошење средства и мора да ги прекине сите активности со исклучок на основните.

За време на овој процес, владините службеници од неесенцијалниот сектор се ставаат на задолжително отсуство, додека есенцијалниот персонал, меѓу кој американската војска, разузнавачките агенции, лекарите и медицинските сестри кои работат во државните болници, аеродромите и персоналот за безбедност на затворите и други продолжуваат да ги извршуваат своите задачи. Овој „персонал од есенцијалниот сектор“ обично не ја добива својата плата за време на периодите на блокада на Владата сѐ додека Конгресот не донесе нов буџет.