Русија прогласи двајца американски дипломати за персона нон грата

МОСКВА (АА) - Русија денес објави дека двајца американски дипломати се прогласени за персона нон грата поради активности што се во спротивност со статусот на дипломатите, јавува Анадолу.

Руското Министерство за надворешни работи соопшти дека ја повикало американската амбасадорка Лин Трејс во Москва и ѝ доставило протестна нота поради „некомпатибилноста“ на постапките на првиот секретар на американската амбасада Џефри Силин и вториот секретар на амбасадата Дејвид Бернштајн со дипломатскиот статус.

„Овие лица вршеле незаконски активности одржувајќи контакти со рускиот државјанин Роберт Шонов, обвинет за 'доверлива соработка' со странска држава“, се вели во соопштението.

„Шонов добил задачи за материјална награда да ѝ наштети на националната безбедност на Руската Федерација. На американскиот амбасадор му било кажано дека Џефри Силин и Дејвид Бернштајн мора да ја напуштат територијата на Русија во рок од седум дена“, се наведува во соопштението.

Министерството, исто така, соопшти дека „незаконските активности на дипломатската мисија на САД, вклучително и мешањето во внатрешните работи на земјата домаќин, се неприфатливи и решително ќе бидат потиснати“.

„Руската страна очекува Вашингтон да ги донесе вистинските заклучоци и да се воздржи од конфронтирачки чекори“, се вели во соопштението.