САД ги повикуваат сојузниците да ја зголемат воената поддршка за Украина

БЕРЛИН (АА) - Американскиот секретар за одбрана, Лојд Остин, ги повика западните сојузници да ја зголемат нивната воена поддршка за Украина, нагласувајќи дека војната влегува во решавачка фаза, јавува Агенција Анадолија (АА).

„Ова е клучен момент. Русија се прегрупира, регрутира и се обидува да се доопреми“, им рече Остин на своите колеги на состанокот на Контакт групата за Украина во воздухопловната база Рамштајн.

„Ова не е момент за забавување. Време е да се копа подлабоко. Украинскиот народ нѐ гледа. Кремљ нѐ гледа. И историјата нѐ гледа“, рече тој.

На состанокот присуствуваат околу 50 министри за одбрана и високи официјални претставници, меѓу кои и украинскиот министер за одбрана, Олексиј Резников и генералниот секретар на НАТО, Јенс Столтенберг.

Говорејќи преку видеолинк, украинскиот претседател Владимир Зеленски ја повтори молбата до меѓународните партнери за посилна воена помош.

„Навистина сум ви благодарен на сите за оружјето што го обезбедивте. Секоја единица помага да се спаси нашиот народ од теророт“, рече тој.

Нагласи дека сојузниците на Украина треба да ја забрзаат испораката на оружје и да ѝ обезбедат на Украина тенкови, артилерија и системи за противвоздушна одбрана за победа.