САД се подготвуваат за трилатерална воена вежба со Јужна Кореја и Јапонија

САД се подготвуваат да одржат трилатерална воена вежба со Јужна Кореја и Јапонија, соопшти Американската команда за Пацификот, сигнализирајќи дека вежбата ќе се одржи и покрај неодамнешното редуцирање на заедничките воени вежби меѓу САД и Јужна Кореја, пренесува Анадолу.

„Во тесна координација со Јапонските сили за самоодбрана и Вооружените сили на Република Кореја, Американската команда за Пацификот се подготвува за вежбата 'Фридом еџ' за 2026 година“, изјави портпаролката на командата, потполковничка Клои Морган, во е-поштата до агенцијата Јонхап.

Морган рече дека вежба која опфаќа повеќе домени ќе ги зајакне интероперабилноста и одбранбената соработка меѓу трите земји, но одби да ги открие времето на одржување, опфатот или обемот.

Одлуката за „Фридом еџ“ произлезе од самитот во Кемп Дејвид во август 2023 година, како дел од напорите за институционализирање на трилатералната безбедносна соработка. Претходните вежби се одржаа во јуни и ноември 2024 година и во септември 2025 година.

Прашањата околу годинашната вежба се појавија откако американскиот претседател Доналд Трамп наложи намалување на времетраењето и обемот на билатералната вежба „Улчи фридом шилд“ со Јужна Кореја. Трамп рече дека големите воени вежби би можеле да пратат „несоодветна и непријателска“ порака до Северна Кореја, додека тој се стреми кон обновување на дијалогот со лидерот Ким Џонг Ун.

Пјонгјанг ги отфрла тврдењата дека вежбите се одбранбени, опишувајќи ги како проби за инвазија, предупредувајќи на засилени контрамерки.