САД уапсија жена обвинета дека дејствувала како нерегистриран кинески агент

Американските власти уапсија жена од Калифорнија на Меѓународниот аеродром во Лос Анџелес додека се обидувала да замине за Кина, јавува Анадолу.

34-годишната Вањинг Џанг, позната и како „Хедер“, од градот Ирвин, беше приведена од теренската канцеларија на ФБИ во Лос Анџелес врз основа на федерална пријава во која се товари дека дејствувала како нерегистриран агент на Народна Република Кина, изјави Бил Есајли, првиот помошник на американскиот јавен обвинител, на американската платформа за социјални медиуми X.

Според писмената изјава под заклетва, Џанг допатувала во Сиетл во 2025 година и, по насоки на кинески официјални лица, вршела надзор врз близок роднина на владин претставник од Тајван, рече Есајли.

Таа наводно испраќала фотографии, видеа и податоци за регистарски таблички до кинески официјални лица и го координирала патувањето со соработник, користејќи методи за да избегне откривање.

„Џанг наводно пропуштила да го извести американскиот јавен обвинител дека дејствува во име на странска влада“, изјави Есајли.

Се очекува таа денес да се појави пред федералниот суд во Лос Анџелес.