Саудиска Арабија издаде предупредување поради „потенцијална опасност“ за Џеда, Мека и Таиф

Саудиска Арабија денес издаде итни предупредувања за „можна опасност“ во Џеда, Мека и Таиф, во западниот дел на земјата, повикувајќи ги жителите да побараат засолниште и да ги следат официјалните безбедносни упатства, јавува Анадолу.

Според саудиската Служба за цивилна заштита, предупредувањата се издадени преку Националната платформа за рано предупредување при итни случаи.

Властите не ја прецизираа природата на потенцијалната опасност.

Жителите беа повикани да останат смирени и веднаш да се упатат кон најблиското безбедно место – по можност во зграда или во внатрешна просторија подалеку од прозорци – и да останат таму додека не помине опасноста.

Службата за цивилна заштита исто така ги советуваше луѓето да се држат подалеку од отворени простори, прозорци, балкони и покриви, додека на оние што се наоѓаат на отворено им беше наложено да влезат во најблиската зграда или да побараат засолниште зад цврста преграда.

На возачите што добија предупредување им е наложено да застанат на безбедно место, подалеку од мостови и високи згради, а јавноста беше повикана да избегнува собири и опасни зони и да ги следи упатствата преку официјалните канали.