Abdulbesar Ademi
26 Февруари 2025•Ажурирај: 27 Февруари 2025
СКОПЈЕ (АА) - Со положување венци и оддавање почит пред споменикот на поранешниот претседател на Северна Македонија, Борис Трајковски, денес беше одбележана 21-годишнината од неговата несреќа во Ротимље близу Мостар, Босна и Херцеговина, каде што го загуби животот заедно со осумчлената делегација од неговиот кабинет, јавува Анадолу.
На церемонијата на полагање венци и оддавање почит на поранешниот претседател Трајковски и членовите на неговиот кабинет, која се одржа на градските гробишта во Бутел, меѓу присутните беа претседателката Гордана Силјановска-Давкова, претставници на владиниот кабинет, членови на семејството на поранешниот претседател Трајковски, како и голем број граѓани.
Свеченост во чест на поранешниот претседател Трајковски се одржа и во Струмица, неговото родно место, како и во Ротимље близу Мостар, каде што се случи несреќата.
Премиерот на Северна Македонија, Христијан Мицкоски, преку објава на социјалните мрежи се потсети на поранешниот претседател, нагласувајќи дека Трајковски ќе остане запаметен по „својата посветеност, смиреност и решителност во најтешките моменти за државата“.
„Македонија тогаш загуби државник со визија, лидер што веруваше во помирување, стабилност и европска иднина на татковината. Вечна му слава! Македонија никогаш нема да го заборави!“, напиша Мицкоски.
Поранешниот претседател Трајковски го загуби животот на 26 февруари 2004 година, заедно со неговата делегација, на патување за учество на меѓународна конференција во Мостар.
Според истрагите спроведени од властите на Босна и Херцеговина и Северна Македонија, причина за несреќата била „процедурална грешка на пилотскиот тим при слетувањето на аеродромот во Мостар, што довело до удар на авионот во ридот Матиќ“ во близина на селото Ротимље.
