Сирија ги повика САД да ги повлечат сите санкции против претходниот режим

ХАМИЛТОН (АА) - Амбасадорот на Сирија во Обединетите нации (ОН), Кусај Ал-Дахак, денес повика на целосно отстранување на санкциите што ѝ се наметнати на Сирија, нагласувајќи дека овие мерки се насочени кон претходниот режим, јавува Анадолу.

„Ја давам изјавата врз основа на инструкциите од властите на Сирија, господин претседател“, рече Ал-Дахак на седницата на Советот за безбедност на ОН за Сирија, додавајќи: „Помина еден месец откако изгреа зората на слободата во Сирија.“

Тој истакна дека Сирија сега влегува во нова ера, со посветеност на градење држава заснована врз слобода, еднаквост и владеење на правото.

„Сиријците ги отстранија синџирите на угнетувањето и ја вратија слободата од која беа лишени со децении“, рече тој, мислејќи на неодамнешното соборување на режимот на Башар ал Асад, што го опиша како „револуција на слободата и достоинството“.

Ал-Дахак особено им се обрати на САД и рече: „Ги повикуваме Соединетите Американски Држави и другите земји целосно да ги укинат овие мерки наметнати на сирискиот народ бидејќи тие првично беа насочени кон претходниот режим.“

Тој истакна дека санкциите ги попречуваат напорите за обнова на Сирија и ги зголемуваат тешкотиите со кои се соочуваат обичните граѓани.

„Сирија верува во партнерство со Обединетите нации и нејзините земји членки. Таа е посветена на унапредувањето на соработката со неа за подобрување на животните и хуманитарните услови на Сиријците, за обезбедување на основните услуги за остварување на нивните аспирации за сегашност и иднина достојна за сириската цивилизација, крвта на нејзините загинати херои и жртвите на нејзиниот народ“, рече тој.

Сирискиот претставник дополнително ги истакна напорите на земјата за обнова.

„Сирија ги повикува членките на Обединетите нации да ги почитуваат волјата на сирискиот народ и неговите избори, за поддршка за државните институции и нивните напори за враќање на безбедноста и стабилноста и просперитетот во општеството. Поради оваа причина надворешните актери не треба да се мешаат. Тие не треба да се мешаат во политичкиот процес“, рече Ал-Дахак, нагласувајќи дека странското мешање ги поткопува интересите на сирискиот народ.

Тој ја повтори посветеноста на Сирија на мирот и изјави дека земјата не сака никаков конфликт или војна.

- Израел мора да прекине со военото присуство на сириската територија -

Барајќи од Израел да прекине со военото присуство на сириската територија, Ал-Дахак рече: „Сирија ја нагласува потребата да се осигури дека израелскиот окупаторски ентитет нема да ги искористи актуелните околности за да го наруши суверенитетот на Сирија во обид да наметне нова реалност преку своите упади со војската.“

Во понеделникот американското Министерство за финансии објави шестмесечно олеснување на санкциите за Сирија за да се олеснат основните услуги во земјата.

Оваа одлука на САД следува по повеќегодишните санкции наметнати како одговор на дејствата на соборениот сириски режим, кои опозицијата и меѓународната заедница ги наведуваат како примарна причина за првичните санкции.

Асад, лидер на Сирија речиси 25 години, побегна во Русија откако антирежимските групи ја презедоа контролата врз Дамаск на 8 декември, ставајќи крај на деценискиот режим на партијата Баас.

Преземањето се случи откако борците на Хајат Тахрир ал-Шам ги освоија клучните градови во молскавична офанзива што траеше помалку од две недели.

Новата администрација предводена од Ахмед ал-Шара сега ја презеде контролата врз земјата.