Стотици луѓе хоспитализирани во Јапонија по обилните врнежи од снег во Токио

ИСТАНБУЛ

Стотици луѓе се хоспитализирани откако во јапонскиот главен град Токио паднаа најобилните врнежи од снег во последните четири години, пренесува Агенција Анадолија (АА).

„Противпожарната служба во Токио извести дека 215 луѓе, на возраст помеѓу 9 и 97 години, биле примени во здравствените центри откако се лизнале и паднале поради мразот и снегот“, објави „Кјодо њуз“.

Во Токио со популација од околу 14 милиони луѓе паднаа околу 10 сантиметри снег до доцна вечерта во четвртокот, создавајќи метеж во сообраќајот.

Температурите се спуштија до - 3,5 степени Целзиусови во Токио, што е за 1,8 степени подолу од претходниот ден, според метеоролошките власти.

Локалната полиција извести дека врнежите од снег биле причина за околу 77 сообраќајни несреќи во градот, кои, исто така, резултирале со многу повредени.

Неповолните временски услови го нарушија сообраќајот и на автопатите, што предизвика преоптовареност, што пак доведе и до принудно откажување на некои летови на Аеродромот „Ханеда“ во Токио.