Трамп изјави дека не планира да разговара со Маск

ИСТАНБУЛ (АА) - Американскиот претседател Доналд Трамп изјави дека нема планови да разговара со милијардерот Илон Маск по нивните јавни вербални дуели претходно оваа недела, известува Анадолу.

„Не, немам планови“, им изјави Трамп на новинарите во петокот вечерта кога беше прашан дали планира да контактира со својот поранешен советник, објави Ен-Би-Си Њуз.

„Не размислувам за Илон. Знаете, само му посакувам сѐ најдобро“, одговори Трамп кога беше прашан за неговото мислење за Маск.

Американскиот претседател категорично рече дека „не е баш заинтересиран“ за напорите за средување на односите со милијардерот.

Разликите започнаа во четврток откако Трамп остро го критикуваше Маск за спротивставување на републиканската политичка мерка поради нејзиното предвидено влијание врз буџетскиот дефицит. Конфликтот брзо ескалираше, предизвикувајќи расправија во Конгресот и влијаејќи врз акциите на Тесла.