УКМТО: Пријавен пожар на брод во Ормускиот Теснец

Пријавен е пожар на брод во Ормускиот Теснец, на девет наутички милји северно од Хасаб во Оман, соопшти денес Агенцијата за поморски трговски операции на Обединетото Кралство (УКМТО), јавува Анадолу.

Според УКМТО, капетанот на друг брод пријавил дека забележал пловило зафатено од пожар.

Состојбата на екипажот останува непозната, а во моментот на објавувањето на соопштението немало информации за процена на штетата или за влијанието врз животната средина.

УКМТО ги советуваше бродовите да пловат низ областа со зголемена претпазливост и да пријавуваат каква било сомнителна активност додека надлежните органи го истражуваат инцидентот.

Инцидентот се случува во услови на зголемени тензии меѓу Иран и САД во врска со пловидбата низ Ормускиот Теснец, клучна рута за глобалното снабдување со енергенси и стоки.

Во февруари, САД и Израел започнаа војна против Иран, кој возврати со напади врз Израел и американски цели во регионот, пред да биде постигнат договор за прекин на огнот во април.

Вашингтон и Техеран подоцна, во јуни, потпишаа Меморандум за разбирање во врска со непреченото пловење низ Ормускиот Теснец, но неговото спроведување беше закочено поради несогласувања околу безбедноста на овој стратегиски воден пат, додека тензиите меѓу двете страни продолжуваат да растат.