Украина: Руската војска изведе ракетни напади на Лавов, Дњепропетровск, Волин и Черкаси

КИЕВ (АА) - Русија во текот на ноќта извела ракетни напади врз Лавов, Дњепропетровск, Волин, Черкаси и други региони во Украина, јавува Анадолу.

Началникот на Воената управа на Област Лавов, Максим Козински, во објавата на својот профил на социјалните мрежи рече дека Русија во текот на ноќта извршила ракетен напад врз тој регион.

Тој додаде дека парчиња од проектилот паднале врз два стана во градот Лавов.

„Во тие домови избувна пожар, има голема штета, луѓето се евакуирани. Има повредени, но нема информации за загинати“, истакна Козински.

Началникот на Воената управа на регионот Дњепропетровск, Сергеј Лисак, исто така, на социјалните мрежи објави дека избувнал пожар во трговски објекти во градот Днипро и дека две лица биле ранети во руските ракетни напади.

Лисак истакна дека во тој регион биле соборени седум крстосувачки проектили.

Началникот на Воената управа на Волинска Област, Јуриј Погуљајко, истакна дека руска ракета погодила продавница во градот Луцк, додавајќи дека во нападите загинале три лица, а неколкумина ранети се однесени во болница.