ФБИ: Нема врска меѓу нападот во Њу Орлеанс и експлозијата во Лас Вегас

ВАШИНГТОН (АА) - Не постои дефинитивна врска помеѓу смртоносниот напад за време на новогодишната ноќ во Њу Орлеанс и нападот со автомобил-бомба пред хотелот ‘Trump International’ во Лас Вегас, изјави денес заменик-помошникот директор на ФБИ, Кристофер Раја, известува Анадолу.

Во Њу Орлеанс, возач влета со пикап во толпата на улицата ‘Бурбон’ за време на новогодишната ноќ, убивајќи најмалку 15 луѓе и повредувајќи повеќе од 30.

ФБИ соопшти дека осомничениот е идентификуван како Шамсуд-Дин Џабар (42) од Тексас.

Во Лас Вегас, Невада, едно лице загина, а седум се повредени откако возилото ‘Tesla Cybertruck’ експлодираше пред хотелот „Трамп интернешенел“, кој е во сопственост на новоизбраниот американски претседател Доналд Трамп.

Раја нападот во Њу Орлеанс го нарече „терористички чин“.

„Тоа беше однапред смислен, злобен чин“, додаде претставникот на ФБИ.

Тој истракна дека во овој момент не оценуваат дека некој друг бил вмешан во нападот, освен Шамсуд-Дин Џабар, воен ветеран, кој бил убиен за време на престрелката со полицијата.

Официјални лица изјавија дека тој бил целосно „инспириран“ од ДЕАШ.

„Како што знаете, најдовме знаме на ДЕАШ во возилото. Џабар на социјалните мрежи објави дека ја поддржува терористичката организација, додека одел во Њу Орлеанс“, рече Раја.

Се проверуваат три мобилни телефони поврзани со Џабар, како и два лаптопи.

„ФБИ не верува дека јавноста околу Њу Орлеанс е во опасност“, додаде Раја.