Necva Taştan Sevinç
22 Мај 2026•Ажурирај: 22 Мај 2026
Група студенти по инженерство во источна Франција се подготвуваат да испратат сендвич со ќебап во блискиот вселенски простор како дел од експериментална мисија во метеоролошки балон, со цел проучување на атмосферските услови и тестирање на научната опрема.
Студентите од Католичкиот институт за уметности и занаети (Ицам) во Стразбур планираат да го испратат сендвичот на надморска височина од околу 35.000 метри (114.800 стапки) на 29 мај, користејќи специјално дизајнирана капсула прикачена на метеоролошки балон, објави денес „Франсинфо“.
Проектот првично бил замислен како научен експеримент за проучување на ветерот, температурата и влажноста на голема надморска височина, се наведува.
Студентите рекоа дека исто така им била потребна креативна идеја за да помогнат во финансирањето на проектот.
„Еден од нашите професори веќе имаше испратено перек во воздухот, па кога дојде време да бараме финансирање, се свртевме кон слична идеја“, рече друг студент.
Тимот партнерски се поврзал со локален ресторан за ќебапи во Стразбур, кој се согласил да го поддржи експериментот.
За време на искачувањето, ќебапот ќе биде изложен на температури кои би можеле да достигнат околу минус 50 степени Целзиусови, додека сензорите и камерите поставени на балонот ќе ги следат атмосферските услови и состојбата на сендвичот.
„Целта е да се измерат температурата, притисокот, влажноста и надморската височина на метеоролошкиот балон со цел да се креираат дијаграм и мапа“, рече еден од студентите.
Откако ќе ја достигне максималната висина, се очекува капсулата да се спушти назад на Земјата.
Лансирањето е планирано да се изврши од предниот двор на Инженерската школа во Шилтигхајм, во близина на Стразбур.
Студентскиот тим соопшти дека проектот би можел да помогне и во подготовката на идни експериментални мисии, додавајќи дека тие веќе работат и на проект за ракета.
